ಅಂಚೆ ಸೇವಕರ ಪ್ರತಿಭಟನೆಗೆ ಕೇಂದ್ರದ ಸ್ಪಂದನೆ, ನಾಲ್ಕು ಪಟ್ಟು ಸಂಬಳ ಏರಿಸಿದ ಮೋದಿ ಸರ್ಕಾರ..

ಕಳೆದ ಹಲವಾರು ದಿನಗಳಿಂದ ಅಂಚೆ ಡಾಕ್ ಸೇವಕರು ನಡೆಸುತ್ತಿದ್ದ ಪ್ರತಿಭಟನೆಗೆ ಕೇಂದ್ರ ಸರ್ಕಾರ ಸ್ಪಂದಿಸಿದೆ‌. ವೇತನ ಹೆಚ್ಚಳ ಸೇರಿದಂತೆ ಹಲವು ಬೇಡಿಕೆಗಳನ್ನು ಮುಂದಿಟ್ಟುಕೊಂಡು ಗ್ರಾಮೀಣ ಅಂಚೆ ಸೇವಕರು ಕಳೆ ಹಲವಾರು ದಿನಗಳಿಂದ ರಾಷ್ಟ್ರಾದ್ಯಂತ ಪ್ರತಿಭಟಿಸುತ್ತಿದ್ದರು. ಪ್ರತಿಭಟನೆಗೆ ಸ್ಪಂದಿಸಿರುವ ಮೋದಿ ಸರ್ಕಾರ ಮೂಲ ವೇತನವನ್ನು ಭರ್ಜರಿ ಪ್ರಮಾಣದಲ್ಲಿ ಏರಿಸಿದೆ. ವೇತನ ಏರಿಕೆ ಜೊತೆ ಅಂಚೆ ಸೇವಕರ ಹಲವಾರು ಬೇಡಿಕೆಗಳಿಗೂ ಕೇಂದ್ರ ಸಂಪುಟ ಸಭೆ ಅಸ್ತು ಎಂದಿದೆ.

ನಿನ್ನೇ ನಡೆದಂತಹ ಕೇಂದ್ರ ಸರ್ಕಾರದ ಸಚಿವ ಸಂಪುಟ ಸಭೆಯಲ್ಲಿ ಗ್ರಾಮೀಣ ಅಂಚೆ ಸೇವಕರ ವೇತನವನ್ನು ಹೆಚ್ಚಳ ಮಾಡಿ ಆದೇಶ ಹೊರಡಿಸಿದೆ. ಕೇಂದ್ರ ಸರ್ಕಾರದ ನಿರ್ಧಾರದ ಅನ್ವಯ ಗ್ರಾಮೀಣ ಡಾಕ್ ಸೇವಕರ ವೇತನ ನಾಲ್ಕು ಪಟ್ಟು ಹೆಚ್ಚಳವಾದಂತಾಗಿದೆ. ಇದುವರೆಗೆ ಮಾಸಿಕ 2,295 ರೂಪಾಯಿ ವೇತನ ಪಡೆಯುತ್ತಿದ್ದವರಿಗೆ ಇನ್ನು ಮುಂದೆ ಹತ್ತು ಸಾವಿರ ರುಪಾಯಿ ನೀಡಲಾಗುವುದು. ಹಾಗೆಯೇ ಮಾಸಿಕ 2,775 ರೂಪಾಯಿ ವೇತನ ಪಡೆಯುತ್ತಿದ್ದವರಿಗೆ ಇನ್ನು ಮುಂದೆ 12,500 ರೂಪಾಯಿ ವೇತನ ಸಿಗಲಿದೆ. ಜೊತೆಗೆ 4,115 ಮಾಸಿಕ ರೂಪಾಯಿ ವೇತನ ಪಡೆಯುತ್ತಿದ್ದವರಿಗೆ ಇನ್ನು 14,500 ರಷ್ಟು ವೇತನ ಸಿಗಲಿದೆ.

ಕೇಂದ್ರ ಸರ್ಕಾರದ ಈ ನಿರ್ಧಾರದಿಂದ ರಾಷ್ಟ್ರಾದ್ಯಂತ ಇರುವ ಸುಮಾರು ಮೂರು ಲಕ್ಷ ಜನ ಗ್ರಾಮೀಣ ಅಂಚೆ ಸೇವಕರಿಗೆ ಉಪಯೋಗವಾಗಲಿದೆ. ಕೇಂದ್ರ ಸರ್ಕಾರದ ನಿರ್ಧಾರದಂತೆ ಪ್ರತಿಯೊಬ್ಬ ಸೇವಕನಿಗೂ ಸುಮಾರು ಒಂದೂವರೆ ಲಕ್ಷ ರೂಪಾಯಿಯಷ್ಟು ಹಿಂಬಾಕಿ ಹಣ ಕೂಡ ಸಿಗಲಿದೆ. ಸರ್ಕಾರದ ಬೊಕ್ಕಸಕ್ಕೆ ಈ ನಿರ್ಧಾರದಿಂದ ಎರಡೂವರೆ ಸಾವಿರ ಕೋಟಿಯಷ್ಟು ಹೊರೆ ಬೀಳಲಿದೆ. ಕೇವಲ ವೇತನ ಹೆಚ್ಚಳ ಅಷ್ಟೇ ಅಲ್ಲದೆ ವೇತನದ ಜೊತೆಗೆ ಅಪಾಯ ಮತ್ತು ಶ್ರಮ ಭತ್ಯೆ, ಮೂರು ಪಾಳಿಯ ಬದಲಾಗಿ ಎರಡು ಪಾಳಿ ಕೆಲಸ ಸೇರಿದಂತೆ ಹಲವು ಭರವಸೆಗಳನ್ನು ಕೇಂದ್ರ ಸರ್ಕಾರ ಈಡೇರಿಸಿದೆ. ಈ ಮೂಲಕ ಮೋದಿ ಸರ್ಕಾರ ಪ್ರತಿಭಟನೆಗೆ ಸ್ಪಂದಿಸಿದ್ದು ದೇಶಾದ್ಯಂತ ಲಕ್ಷಾಂತರ ಅಂಚೆ ಸೇವಕರು ಸಂಭ್ರಮಾಚರಣೆಯಲ್ಲಿದ್ದಾರೆ.