ಮಾಜಿ ಪ್ರಧಾನಿ ರಾಜೀವ್‌ ಗಾಂಧಿ ಹತ್ಯೆ ಮಾದರಿಯಲ್ಲಿ ನರೇಂದ್ರ ಮೋದಿ ಹತ್ಯೆಗೆ ಸಂಚು?

ನವದೆಹಲಿ: ಪ್ರಧಾನಮಂತ್ರಿ ನರೇಂದ್ರ ಮೋದಿ ಹತ್ಯೆಗೆ ಮಾವೋವಾದಿಗಳು ಸಂಚು ರೂಪಿಸಿರುವ ಕುರಿತು ಪುಣೆ ಪೋಲೀಸರಿಗೆ ಸ್ಫೋಟಕ ಮಾಹಿತಿ ಲಭ್ಯವಾಗಿದೆ.

ನಿಷೇಧಿತ ಮಾವೋವಾದಿ ಸಂಘಟನೆ ಸಿಪಿಐನೊಂದಿಗೆ ಸಂಬಂಧ ಹೊಂದಿರುವ ಸಂಬಂಧ ಪೊಲೀಸರು ಬಂಧಿಸಿರುವ ಐವರು ವ್ಯಕ್ತಿಗಳಲ್ಲಿ ಓರ್ವನ ಮನೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಹತ್ಯೆಗೆ ಸಂಚು ರೂಪಿಸಿರುವ ಕುರಿತು ಪತ್ರವೊಂದು ದೊರಕಿದೆ.

ಪತ್ರದಲ್ಲಿ ಮಾಜಿ ಪ್ರಧಾನಿ ರಾಜೀವ್‌ ಗಾಂಧಿ ಹತ್ಯೆಯಾದ ರೀತಿಯಲ್ಲೇ ಪ್ರಧಾನಿ ಮೋದಿ ಅವರನ್ನು ಹತ್ಯೆ ಮಾಡುವ ಕುರಿತು ಪತ್ರದಲ್ಲಿ ಉಲ್ಲೇಖಿಸಲಾಗಿದೆ ಎಂದು ಪೊಲೀಸರು ಕೋರ್ಟ್‌ಗೆ ತಿಳಿಸಿದ್ದಾರೆ.

ಡಿಸೆಂಬರ್‌ನಲ್ಲಿ ನಡೆದ ‘ಎಲ್ಗರ್ ಪರಿಷತ್’ ಮತ್ತು ಭೀಮಾ-ಕೊರೆಗಾಂವ್ ಹಿಂಸೆಗೆ ಸಂಬಂಧಿಸಿದಂತೆ ಬುಧವಾರ ಮುಂಬೈನಲ್ಲಿ ದಲಿತ ಹೋರಾಟಗಾರ ಸುಧೀರ್‌ ದಾವಾಲೆ, ವಕೀಲ ಸುರೇಂದ್ರ ಗಾಡ್ಲಿಂಗ್‌, ಮಹೇಶ್‌ ರಾವತ್‌, ಶೋಮಾ ಸೇನ್‌ ಮತ್ತು ರೋನಾ ವಿಲ್ಸನ್‌ರನ್ನು ಪೊಲೀಸರು ಬಂಧಿಸಿದ್ದರು.

ಇವರಲ್ಲಿ ದೆಹಲಿಯ ರೋನಾ ವಿಲ್ಸನ್‌ ಮನೆಯಲ್ಲಿ ದೊರೆತ ಪತ್ರದಲ್ಲಿ ಎಂ-4 ರೈಫಲ್‌ ಖರೀದಿಗೆ ಮತ್ತು ಇತರೆ ಕೆಲಸಕ್ಕಾಗಿ 8 ಕೋಟಿ ರೂಪಾಯಿ ಅಗತ್ಯವಿರುವ ಕುರಿತು ಉಲ್ಲೇಖಿಸಿ ರಾಜೀವ್‌ ಗಾಂಧಿ ಹತ್ಯೆಯಂತೆ ಮತ್ತೊಂದು ಅವಘಡ ಸೃಷ್ಟಿಸುವ ಕುರಿತು ತಿಳಿಸಲಾಗಿತ್ತು ಎಂದು ವಕೀಲ ಉಜ್ವಲ್‌ ಪವಾರ್‌ ನ್ಯಾಯಾಲಯಕ್ಕೆ ತಿಳಿಸಿದ್ದಾರೆ.

ಆರೋಪಿಗಳ ಮನೆಯಲ್ಲಿ ಸಿಕ್ಕಿರುವ ಇತರೇ ಪತ್ರಗಳಲ್ಲಿ ‘ಎಲ್ಗರ್ ಪರಿಷತ್’, ಭೀಮಾ-ಕೊರೆಗಾಂವ್ ಹಿಂಸೆ ಮತ್ತು ಇತರೇ ಮಾವೋವಾದಿಗಳಿಂದ ನಡೆದ ದಾಳಿಗಳ ಕುರಿತಾಗಿ ಸಾಕ್ಷ್ಯಗಳನ್ನು ಒದಗಿಸಿವೆ ಎಂದು ತಿಳಿಸಿದ್ದಾರೆ