70 ದಿನಗಳಲ್ಲಿ 44 ಉಗ್ರರನ್ನು ಹತ್ಯೆಗೈದ ಭಾರತೀಯ ಸೇನೆ – Vishwanews24

ನವದೆಹಲಿ,: 2019 ಆರಂಭವಾದಾಗಿನಿಂದ ಈವರೆಗೆ ಅಂದರೆ 70 ದಿನಗಳಲ್ಲಿ ಭಾರತ 44 ಮೋಸ್ಟ್ ವಾಂಟೆಡ್ ಉಗ್ರರನ್ನು ಹತ್ಯೆಗೈದಿದೆ ಎಂದು ಭಾರತೀಯ ಸೇನಾಧಿಕಾರಿಗಳು ಸ್ಪಷ್ಟಪಡಿಸಿವೆ.

ದೆಹಲಿಯಲ್ಲಿ ಸುದ್ದಿಗೋಷ್ಟಿಯಲ್ಲಿ ಮಾತನಾಡಿದ ಸೇನಾಧಿಕಾರಿಗಳು, 70 ದಿನಗಳಲ್ಲಿ ಭಾರತೀಯ ಸೇನಾಪಡೆ ಒಂದಲ್ಲ, ಎರಡಲ್ಲ 44 ಮಂದಿ ಉಗ್ರರನ್ನು ಹೊಡೆದುರುಳಿಸಿದೆ. ಇದು ಭಾರತೀಯ ಸೇನೆಯ ಬಲ ಎಂದು ವಿವರಿಸಿದರು. ಇನ್ನು 2019 ಆರಂಭವಾದಾಗಿನಿಂದ ಈವರೆಗೆ ಪಾಕಿಸ್ತಾನ ಅಂತರರಾಷ್ಟ್ರೀಯ ಗಡಿನಿಯಂತ್ರಣ ರೇಖೆಯಲ್ಲಿ ಬರೋಬರಿ 478 ಬಾರಿ ಕದನ ವಿರಾಮ ಉಲ್ಲಂಘಿಸಿ ಅಪ್ರಚೋದಿತ ಗುಂಡಿನ ದಾಳಿ ನಡೆಸಿದೆ. ಪಾಕಿಸ್ತಾನದ ಈ ದಾಳಿಗೆ ಭಾರತೀಯ ಸೇನೆ ದಿಟ್ಟವಾಗಿ ಎದುರಿಸಿದೆ ಎಂದರು.

ಇನ್ನು ಫೆ.14 ರಂದು ಪುಲ್ವಾಮಾದಲ್ಲಿ ನಡೆದ ವಿಧ್ವಂಸಕ ಕೃತ್ಯಕ್ಕೆ ಕಾರಣವಾಗಿರುವ ಜೈಶ್-ಇ-ಮೊಹಮದ್ ಸಂಘಟನೆ ಉಗ್ರರನ್ನೇ ಸೇನೆ ಹೆಚ್ಚಾಗಿ ಹೊಡೆದುರುಳಿಸಿದೆ. 70 ದಿನಗಳ ಅವಧಿಯಲ್ಲಿ ಭಾರತೀಯ ಸೇನಾಪಡೆ 44 ಉಗ್ರರನ್ನು ಹೊಡೆದುರುಳಿಸಲಾಗಿದೆ. ಆದರೆ, ದುರಾದೃಷ್ಟವಶಾತ್ ಇದಕ್ಕಿಂತ ಹೆಚ್ಚಿನ ಸಂಖ್ಯೆಯ ಸೈನಿಕರನ್ನು ನಾವು ಕಳೆದುಕೊಂಡಿದ್ದೇವೆ. ಪುಲ್ವಾಮಾ ದಾಳಿಗೆ ಹುತಾತ್ಮರಾದ ಸೈನಿಕರು ಸೇರಿ 50ಕ್ಕೂ ಹೆಚ್ಚು ಸೈನಿಕರು 70 ದಿನಗಳಲ್ಲಿ ದೇಶಕ್ಕಾಗಿ ಪ್ರಾಣತ್ಯಾಗ ಮಾಡಿದ್ದಾರೆ ಎಂದರು. ಕಳೆದ 21 ದಿನಗಳ ಅಂತರದಲ್ಲಿ 18 ಉಗ್ರರನ್ನು ಹತ್ಯೆಗೈದಿದ್ದು, ಅದರಲ್ಲಿ 14 ಜೈಶ್-ಇ-ಮೊಹಮದ್ ಸಂಘಟನೆಯವರು ಸೇರಿದ್ದಾರೆ. ಈ 14 ಮಂದಿಯ ಪೈಕಿ 6 ಮಂದಿ ಸಂಘಟನೆಯ ಕಮಾಂಡರ್ ಗಳಾಗಿದ್ದಾರೆಂದು ಸೇನಾಧಿಕಾರಿಗಳು ವಿವರಿಸಿದರು.