ಮಂಗಳೂರಿನ ಮಾರುಕಟ್ಟೆಗೆ ಬಂದ ಈಜಿಪ್ಟ್ ದೇಶದ ಈರುಳ್ಳಿ -Vishwanews24
ಮಂಗಳೂರು: ಮಂಗಳೂರಿನ ಮಾರುಕಟ್ಟೆಗೆ ಈಜಿಪ್ಟ್ ದೇಶದ ಈರುಳ್ಳಿ ಬಂದಿದೆ. ಬುಧವಾರ ಬೆಳಗ್ಗೆ ಲಾರಿಯಲ್ಲಿ ಪುಣೆಯಿಂದ ಮಂಗಳೂರಿನ ಸೆಂಟ್ರಲ್ ಮಾರ್ಕೆಟ್ಗೆ ಬಂದಿದೆ.
ನಗರದ ಪ್ರಮುಖ ಈರುಳ್ಳಿ ವ್ಯಾಪಾರ ಸಂಸ್ಥೆ ಸಾಯಿ ಟ್ರೇಡರ್ ಗೆ ಈ ವಿದೇಶಿ ಈರುಳ್ಳಿ ಬಂದಿದ್ದು, ಅನ್ಲೋಡ್ ಆದ ಕೂಡಲೇ ಚಿಲ್ಲರೆ ಮತ್ತು ಸಗಟು ವ್ಯಾಪಾರಿಗಳಿಗೆ ಇದು ವಿತರಣೆಯಾಗಿದೆ.
ಮಂಗಳೂರಿಗೆ ವಿದೇಶಿ ಈರುಳ್ಳಿ ಇದೇ ಮೊದಲ ಬಾರಿಗೆ ಪೂರೈಕೆಯಾಗಿದೆ. ಈಜಿಪ್ಟಿಯನ್ ಈರುಳ್ಳಿ ದೊಡ್ಡ ಗಾತ್ರದಲ್ಲಿದ್ದು, ಸಾಮಾನ್ಯವಾಗಿ ಒಂದು ಈರುಳ್ಳಿ 250 ಗ್ರಾಂ (ಕಾಲು ಕೆ.ಜಿ.) ತೂಕವಿದೆ. ಇದರ ಬಣ್ಣ ಸ್ವಲ್ಪ ಜಾಸ್ತಿ ಕೆಂಪು ಇದ್ದು, ನೋಡಲು ಹೆಚ್ಚು ಅಂದವಾಗಿದೆ.
ನಗರದ ಸೆಂಟ್ರಲ್ ಮಾರ್ಕೆಟ್ನಲ್ಲಿ ಬುಧವಾರ ಈಜಿಪ್ಟಿಯನ್ ಈರುಳ್ಳಿಯ ದರ ಸಗಟು ಮಾರಾಟ ಬೆಲೆ ಕೆ.ಜಿ.ಗೆ 62 ರೂ. ಹಾಗೂ ಚಿಲ್ಲರೆ ಮಾರಾಟ ಬೆಲೆ 65 ರೂ. ಇತ್ತು. ಪೂನಾದಿಂದ ಇದು ಕೆ.ಜಿ. ಒಂದರ 50 ರೂ.ನಂತೆ ಸಾಯಿ ಟ್ರೇಡರ್ ಗೆ ತಲುಪಿದ್ದು, ಅಲ್ಲಿಂದ 57 ರೂಪಾಯಿಗೆ ಸಗಟು ಮತ್ತು ಚಿಲ್ಲರೆ ವ್ಯಾಪಾರಿಗಳ ಕೈಸೇರಿದೆ. ದೇಶೀಯ ಈರುಳ್ಳಿ ದರ ಹಳೆಯ ಈರುಳ್ಳಿಗೆ 75 ರೂ. ಹಾಗೂ ಹೊಸ ಈರುಳ್ಳಿಗೆ 70 ರೂ. ಇದೆ. ಹೊಸ ಈರುಳ್ಳಿಯಲ್ಲಿ ಸಣ್ಣ ಈರುಳ್ಳಿ ಎಂಬ ಇನ್ನೊಂದು ವೆರೈಟಿ ಇದ್ದು, ಅದರ ಬೆಲೆ 50 ರೂ. ಇದೆ.