ಒಂದು ವರ್ಷದ ಬಳಿಕ ಬ್ಯಾಂಕ್ ಲಾಕರ್ ತೆರೆದ ಮಹಿಳೆಗೆ ಶಾಕ್ – ಗೆದ್ದಲು ಪಾಲಾಯ್ತು ಮಗಳ ಮದುವೆಗೆಂದು ಕೂಡಿಟ್ಟ 18 ಲಕ್ಷ ರೂ. Vishwanews24
ಒಂದು ವರ್ಷದ ಬಳಿಕ ಬ್ಯಾಂಕ್ ಲಾಕರ್ ತೆರೆದ ಮಹಿಳೆಗೆ ಶಾಕ್ ..
ಗೆದ್ದಲು ಪಾಲಾಯ್ತು ಮಗಳ ಮದುವೆಗೆಂದು ಕೂಡಿಟ್ಟ 18 ಲಕ್ಷ ರೂ.
ಲಕ್ನೋ: ಉತ್ತರಪ್ರದೇಶದ ಮೊರಾದಾಬಾದ್ನಲ್ಲಿ ತಾಯಿಯೊಬ್ಬಳು ಮಗಳ ಮದುವೆಗೆಂದು ಜೋಪಾನವಾಗಿ ಕೂಡಿಟ್ಟ 18 ಲಕ್ಷ ರೂ. ಹಣವು ಬ್ಯಾಂಕ್ನ ಲಾಕರ್ನಲ್ಲಿ ಗೆದ್ದಲು ಹಿಡಿದು ನಾಶವಾಗಿರುವ ಘಟನೆ ವರದಿಯಾಗಿದೆ.
ಮೊರಾದಾಬಾದ್ ನಿವಾಸಿ ಅಲ್ಕಾ ಪಾಠಕ್ ಕಳೆದ ವರ್ಷ ಅಕ್ಟೋಬರ್ನಲ್ಲಿ ಬ್ಯಾಂಕ್ ಆಫ್ ಬರೋಡಾದ ಆಶಿಯಾನಾ ಶಾಖೆಯಲ್ಲಿ 18 ಲಕ್ಷ ರೂಪಾಯಿ ಹಣವನ್ನು ಲಾಕರ್ನಲ್ಲಿ ಇರಿಸಿದ್ದರು. ಇತ್ತೀಚೆಗಷ್ಟೇ ಮಹಿಳೆಯನ್ನು ಸಂಪರ್ಕಿಸಿದ ಬ್ಯಾಂಕ್ ಸಿಬ್ಬಂದಿ ಲಾಕರ್ ಒಪ್ಪಂದವನ್ನು ರಿನಿವಲ್ ಮಾಡಲು ಮತ್ತು ಕೆವೈಸಿ ಮಾಹಿತಿ ಅಪ್ಡೇಟ್ ಮಾಡಲು ಶಾಖೆಗೆ ಭೇಟಿ ನೀಡುವಂತೆ ತಿಳಿಸಿದ್ದಾರೆ.
ಬ್ಯಾಂಕ್ಗೆ ಬಂದ ಅಲ್ಕಾ ಪಾಠಕ್ ತನ್ನ ಲಾಕರ್ ಅನ್ನು ಓಪನ್ ಮಾಡಿದ್ದಾರೆ. ಆದರೆ ಆಗ ಆಕೆಗೆ ದೊಡ್ಡ ಆಘಾತವಾಗಿದೆ. ಏಕೆಂದರೆ ಮಗಳ ಮದುವೆಗೆಂದು ಕಷ್ಟಪಟ್ಟು ಸಂಗ್ರಹಿಸಿಟ್ಟಿದ್ದ 18 ಲಕ್ಷ ರೂ. ಮೌಲ್ಯದ ನೋಟುಗಳನ್ನು ಗೆದ್ದಲು ಹುಳುಗಳು ತಿಂದಿದ್ದವು.
ಈ ಘಟನೆಯಿಂದ ಬ್ಯಾಂಕ್ ಅಧಿಕಾರಿಗಳೂ ಬೆಚ್ಚಿಬಿದ್ದಿದ್ದಾರೆ. ಈ ವಿಷಯ ವ್ಯಾಪಕವಾಗಿ ವರದಿಯಾದಾಗ ಮತ್ತು ಮಾಧ್ಯಮಗಳು ಉತ್ತರಕ್ಕಾಗಿ ಅವರನ್ನು ಒತ್ತಾಯಿಸಿದಾಗ ಬ್ಯಾಂಕ್ ಆಫ್ ಬರೋಡಾ ಪ್ರಧಾನ ಕಚೇರಿಗೆ ವರದಿಯನ್ನು ಕಳುಹಿಸಿರುವುದಾಗಿ ಬ್ಯಾಂಕ್ ಸಿಬ್ಬಂದಿ ಹೇಳಿದ್ದಾರೆ.
ತನಗಾದ ನಷ್ಟಕ್ಕೆ ಬ್ಯಾಂಕ್ನವರೇ ಪರಿಹಾರ ನೀಡಬೇಕೆಂದು ಮಹಿಳೆ ಆಗ್ರಹಿಸಿದ್ದಾರೆ.