ಪಾಕಿಸ್ತಾನದಲ್ಲಿ ತರಬೇತಿ ಪಡೆದ ಉಗ್ರರು ದೇಶದೊಳಗೆ ನುಸುಳಿ ದಾಳಿ ನಡೆಸುವ ಸಾಧ್ಯತೆ : ಗುಜರಾತ್ ಬಂದರುಗಳಲ್ಲಿ ಹೈ ಅಲರ್ಟ್ ಘೋಷಣೆ -Vishwanews24

ಹೊಸದಿಲ್ಲಿ: ಸಮುದ್ರ ಮಾರ್ಗವಾಗಿ ಪಾಕಿಸ್ತಾನದಲ್ಲಿ ತರಬೇತಿ ಪಡೆದ ಕಮಾಂಡೋಗಳು ಭಾರತದೊಳಗೆ ನುಸುಳಿ ಗುಜರಾತ್ ನಲ್ಲಿ ಮತೀಯ ಸಂಘರ್ಷ ಅಥವಾ ಉಗ್ರ ದಾಳಿ ನಡೆಸುವ ಸಾಧ್ಯತೆಯಿದೆಯೆಂಬ ಗುಪ್ತಚರ ಮಾಹಿತಿ ಹಿನ್ನೆಲೆಯಲ್ಲಿ ಗುಜರಾತ್ ನ ಎಲ್ಲಾ ಬಂದರುಗಳಲ್ಲಿ ಹೈ ಅಲರ್ಟ್ ಘೋಷಿಸಲಾಗಿದೆ.

ಪಾಕಿಸ್ತಾನದಲ್ಲಿ ತರಬೇತಿ ಪಡೆದ ಕಮಾಂಡೋಗಳು ಗಲ್ಫ್ ಆಫ್ ಕಚ್ಚ್ ಪ್ರದೇಶವನ್ನು ಹರಾಮಿ ನಾಲ ಮೂಲಕ ಪ್ರವೇಶಿಸುವ ಸಾಧ್ಯತೆ ಕುರಿತಂತೆ ಕೋಸ್ಟ್ ಗಾರ್ಡ್ ಸೂಚನೆ ದೊರಕಿದ್ದು, ಈ ಕಮಾಂಡೋಗಳು ಜಲಾಂತರ್ಗಾಮಿ ದಾಳಿಗಳಲ್ಲಿ ಪರಿಣತರೆಂದು ತಿಳಿಯಲಾಗಿದೆ’ ಎಂದು ಅದಾನಿ ಪೋರ್ಟ್ಸ್ ಎಂಡ್ ಎಸ್‍ಇಝೆಡ್ ಬಿಡುಗಡೆಗೊಳಿಸಿದ ಹೇಳಿಕೆ ತಿಳಿಸಿದೆ.

ದೀನ್ ದಯಾಳ್ ಬಂದರು ಮಂಡಳಿಯ ಸಿಗ್ನಲ್ ಸುಪರಿಂಟೆಂಡೆಂಟ್ ಕೂಡ ಅಲರ್ಟ್ ಘೋಷಿಸಿ ಗರಿಷ್ಠ ಭದ್ರತೆ ಮತ್ತು ಸುರಕ್ಷತಾ ಕ್ರಮಗಳನ್ನು ಕೈಗೊಳ್ಳುವಂತೆ ಸೂಚಿಸಿದ್ದಾರೆ. ಕರಾವಳಿ ಸಮೀಪ ಎಲ್ಲಾ ಶಂಕಿತ ವ್ಯಕ್ತಿಗಳು ಹಾಗೂ ಬೋಟುಗಳ ಮೇಲೆ ನಿಗಾ, ಸತತ ಗಸ್ತು ಹಾಗೂ ಸುತ್ತಮುತ್ತಲಿನ ಎಲ್ಲಾ ಕಚೇರಿಗಳು ಹಾಗೂ ಮನೆಗಳಲ್ಲಿ ತಪಾಸಣೆ ಕೈಗೊಳ್ಳುವಂತೆ ಅವರು ನೀಡಿದ ಸೂಚನೆ ತಿಳಿಸಿದೆ.