ಮಂಗಳೂರು :ದಕ್ಷಿಣ ಭಾರತದ ಅತ್ಯಂತ ಕ್ಷಿಪ್ರಗತಿಯಲ್ಲಿ ಬೆಳೆಯುತ್ತಿರುವ ವಿಮಾನ ನಿಲ್ದಾಣವಾಗಿ ಮಂಗಳೂರು ವಿಮಾನ ನಿಲ್ದಾಣ ತನ್ನನ್ನು ಗುರುತಿಸಿಕೊಳ್ಳುತ್ತಿದೆ. ಕಳೆದೊಂದು ವರ್ಷದ ಅವಧಿಯಲ್ಲಿ ವಿಮಾನ ನಿಲ್ದಾಣದಲ್ಲಿ ಪ್ರಯಾಣಿಕರ ಸಂಖ್ಯೆಯಲ್ಲಿ ಶೇ 30ರಷ್ಟು ಏರಿಕೆ ಕಂಡಿದೆ.
ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಮೂಲಕ 2016-17ರಲ್ಲಿ ಒಟ್ಟು 17.5 ಲಕ್ಷ ಪ್ರಯಾಣಿಕರು ಪ್ರಯಾಣಿಸಿದ್ದರೆ, 2017-18ರಲ್ಲಿ ಈ ಸಂಖ್ಯೆ 23.4 ಲಕ್ಷಕ್ಕೇರಿದೆ. ಈಗ ವಿಮಾನ ನಿಲ್ದಾಣದಲ್ಲಿ ಪ್ರತಿದಿನ 60ಕ್ಕೂ ಹೆಚ್ಚು ವಿಮಾನಗಳ ಸಂಚಾರವಿದ್ದು, ಮುಂದಿನ ಕೆಲವು ದಿನಗಳಲ್ಲಿ ಈ ಸಂಖ್ಯೆ 80ಕ್ಕೇರಲಿದೆ.
“ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಮೂಲಕ ಸಾಗುವ ಪ್ರಯಾಣಿಕರ ಸಂಖ್ಯೆಯಲ್ಲಿ ಹೆಚ್ಚಳ ಹಾಗೂ ವಿಮಾನಗಳ ಸಂಖ್ಯೆಯಲ್ಲಿನ ಹೆಚ್ಚಳವನ್ನು ಗಮನಿಸಿ ಇಲ್ಲಿನ ಟರ್ಮಿನಲ್ ಕಟ್ಟಡದ ವಿಸ್ತೀರ್ಣವನ್ನು ಮುಂದಿನ ಕೆಲವು ವರ್ಷಗಳಲ್ಲಿ ಒಂದೂವರೆ ಪಟ್ಟು ಹೆಚ್ಚಿಸುವ ಪ್ರಸ್ತಾಪವಿದೆ” ಎಂದು ನಿರ್ದೇಶಕ ವಾಸಂಸೆಟ್ಟಿ ವೆಂಕಟೇಶ್ವರ ರಾವ್ ಹೇಳಿದ್ದಾರೆ. ಸದ್ಯ ಈ ಪ್ರಕ್ರಿಯೆ ಟೆಂಡರ್ ಹಂತದಲ್ಲಿದ್ದು ಕಾರ್ಯಾರಂಭಗೊಂಡ 18 ತಿಂಗಳೊಳಗಾಗಿ ಮುಗಿಸುವ ಅಂದಾಜಿದೆ.
ಪರ್ಯಾಯ ಟ್ಯಾಕ್ಸಿ ಟ್ರ್ಯಾಕ್ ಮೊದಲನೇ ಹಂತ ಈಗಾಗಲೇ ಪೂರ್ಣಗೊಂಡು ಕಾರ್ಯಾಚರಿಸುತ್ತಿರುವುದರಿಂದ ಪ್ರತಿ ಗಂಟೆಗೆ ನಿರ್ವಹಿಸಬಹುದಾದ ವಿಮಾನಗಳ ಸಂಖ್ಯೆ ಹಿಂದಿನ 10ರಿಂದ 14ಕ್ಕೇರಿದೆ. ಈ ಯೋಜನೆಯ ಎರಡನೇ ಹಂತ ಪೂರ್ಣಗೊಂಡಾಗ ಪ್ರತಿ ಗಂಟೆಯಲ್ಲಿ 17 ವಿಮಾನಗಳನ್ನು ನಿರ್ವಹಿಸಬಹುದಾಗಿದೆ ಎಂದು ಅವರು ಹೇಳಿದ್ದಾರೆ.
ಸುರಕ್ಷತಾ ಕ್ರಮವನ್ನು ಹೆಚ್ಚಿಸುವ ನಿಟ್ಟಿನಲ್ಲಿ ರನ್-ವೇ ಬದಿಯ ಬೇಸಿಕ್ ಸ್ಟ್ರಿಪ್ ಅಗಲವನ್ನು 75 ಮೀಟರಿನಿಂದ 150 ಮೀಟರಿಗೆ ಹೆಚ್ಚಿಸಲಾಗಿದೆ. ಭದ್ರತಾ ವ್ಯವಸ್ಥೆಗಳೂ ಇನ್ನಷ್ಟು ಆಧುನಿಕಗೊಂಡಿದ್ದು ಸರ್ವೇಲೆನ್ಸ್ ಹಾಗೂ ಮೊನೋಪಲ್ಸ್ ಸರ್ವೇಲೆನ್ಸ್ ರಾಡಾರ್ ಹಾಗೂ ಡಿವಿಓಆರ್ ಇವುಗಳನ್ನು ಅಳವಡಿಸಲಾಗಿದೆ.
